Sejarah Hari Gawai Dayak Gawai Dayak baru udah disambut raban kitai bansa Dayak. Aku berasai temegah ati laban nadai ninga / macha berita ke enda manah beserimbai enggau gawai taun tu. Taun tu asaika nadai ninga berita orang belaya, bebunuh tauka bebadi sebelah jalai alun enggau pekara enda manah ke bukai. Naka ke ditemu, nadai ga ninga rita rumah angus laban orang mabuk [hehe...]. Nya nandaka kitai bansa sigi manah ulah, manah ati sereta manah budi.
Pelaba aku, mayuh kitai rebak baru [nyengkaum aku empu] enda nemu sejarah Hari Gawai Dayak. Ditu aku deka ngenang bakani asal Gawai tu lalu orang ke bebendar ngaga jalai ngambika Gawai Dayak tu nyadi siti pengerami ke diaku perintah.
Hari Gawai Dayak tu siti ari pengerami ti diintu di Sarawak ninting taun kena 1 Haribulan Jun. Iya diintu semua pupu raban bansa Dayak. Nya alai iya hari diau ke semua rayat di Sarawak laban sida bela ngerami hari nya. Maya hari tu, sida ke bansa Dayak ti diau di nengeri tauka di menua pesisir kiruh nyambut penatai pengabang ke datai besun-sun.
Hari Gawai Dayak udah nyadi hari besai kenyau ari taun 1964 udah bekau Council Negeri ti ngemasukka iya ba Gazette nengeri Sarawak lebuh 25 Haribulan September 1964. Hari Gawai Dayak terubah iya diintu dalam taun 1965.
Raban bansa Dayak kelebih sida ke nembiak rebak baru kemaya hari tu patut bendar temegah ati sereta beterima kasih ngagai tuai raban bansa Dayak baka Datuk Tra Zenhnder ke udah bendar amat minta hari nya dikemendarka perintah. Peminta nya udah didinga Kepala Menteri menua Sarawak keterubah iya, Datuk Stephen Kalong Ningkan enggau bala menteri iya lebuh nya suba.
Pemutus runding perintah ke ngemendarka Hari Gawai nyadi hari diau nya mai besai bendar reti ke raban bansa Dayak. Iya ukai semina nyadika tanda bansa bukai ngelala sereta bebasaka bansa Dayak tang iya mega nyadika tali penanchang ngagai mayuh raban bansa Dayak ti ngujungka sida ulih beserakup sereta begulai sejalai dalam semua pengawa.
Kemaya hari tu Hari Gawai udah pegari tampak rita di menua Sarawak. Iya diintu ngena mayuh macham pengerami ke mandangka pengaya adat asal bansa Dayak ba menua tu. Bansa ke ukai peturun Dayak ti enda sama pengarap enggau sida nadai sanggu datai ngabang lebuh Hari Gawai. Enti sida enda ulih datai, suba sida ngirumka kad pesan Selamat Hari Gawai, tang kemaya hari tu ketegal ubah pemasang dunya, kad nya tadi diganti enggau pesan jaku pandak ke taip sereta dikirum nengah telefon binching tauka dikenataika nengah emel tauka facebook. Nya alai Gawai Dayak tetap nyadika lambang pupu raban bansa di Malaysia. Ketegal tu, iya udah narit ati bala temuai ari menua bukai.
Sumber: blog Tempalai Kenang
