"Orang Iban sememangnya master of language kerana mereka pandai menggunakan bahasa di setiap baris ayat, mencipta dan membina puisi dengan cantik, bijak dalam memilih dan menyusun ayat serta mempunyai banyak jenis puisi yang menggunakan penyusunan ayat yang sesuai dengan bunyi seperti yang digunakan dalam poem dan prose Bahasa Inggeris" Prof Derek Freeman, pengkaji bahasa Iban.

Friday, October 26, 2012

Trip Ke Sabah Part 2

Hari kedua ba mengeri Sabah kami sebuat lalu ngagai tempat ke endang dituju ati ianya Pasar Filipina. Seninjik bendar, pasar tu enda jauh ari tempat kami menyanak diau. Taja pia, kami sebuat ngena kereta. Sinu ke indai ke enda ulih bejalai beguai-guai beperaka ka jalai.

Amat-amat ga maya nya, nyau ka setengah jam bepusin ngiga tempat parking. Nyau pengujung, baru bisi endur parking. Kereta ga ngemayuh-mayuh nya. Enti nemu baka nya, nyamai meh bejalai kaki belubah-lubah ari apartment tadi. Nadai kiruh abis muchau begigaka ala parking.

Tama ngagai Pasar Filipina, amat tak abis ati meda utai dijual orang dia. Ketebal agi barang ke dijual dia baka sida mutiara, kristal, gari enggau barang ke digaga ngena pengelandik jari. Setengah hari kami sebuat dia, enda meh kedai nya abis pasuk. Barang mua naka pemayuh sereta memanah. Nadai alai endur mantah. Sempat mega meli set mutiara [gelang jari enggau marik], bala antin enggau baju ke bai pulai.

Ari belakang pasarnya nya tadi, bisi kawasan lapang nunga tasik enggau pulau ke ulih dipeda mata. Sempat kami sebuat begambar ke pengingat dudi  hari ila. Benung tudah kami beposing, enda mukai-mukai tak datai dua tiga iku anembiak mit urung 4 - 5 taun nuju kami. Nya baka gari, insak nyau berkerak sebelah kuyu sereta nadai beselipa tauka bekasut. Tudah indai, laban ke jarang meda utai bakanya, tak tegepang ati. "Nama utai tu?" ko tudah tuai tekenyit meda anembiak ka datai nya tadi lalu nyurungka jari.

Aku ingatka pesan bala bakih, anang sekali-kali meri sida ia duait taja kitai sinu meda sida laban lagi sida tau ngagauka kaban bukai datai beraban mayuh agi. Enda tan kita nyadung duit ngagai sida enda pia? Udah ga ka shopping ku jaku, nya duit nyau abis beri ngagai orang. Nadai penyadi. Nya alai aku lalu madah ngagai bala bukai, anang ibuhka sida anembiak nya.

Ngerarika diri ari bala anembiak nya tadi kami lalu nuju pasar ikan masin ke enda jauh ari nya. Nya meh ika enggau indai nyau nyengkau senyengkau bungkus ikan masin [baka ke nadai ikan masin ba Sarawak]. Tang siti manah, laban dia rega ia enda tak kelalu mar sereta ulih ditawar. Nama agi, nyau sekutak besai ikan masin dibeli [ikan masin ke jarang kitai meda dijual di menua kami, enda nemu pelilih menua bukai].

Udah bekau ke belelak tengah hari nya, kami sebuat nurun baru. Kenu ko jaku ka nemuai ngagai Muzium Sabah. Laban ka ngenemu kediri, kami sebuah mupuk ngena kereta. Bejalai buta semina nitihka peta. Bepusin-pusin kami sebuat nadai ga temu jalai. Kereta ga mayuh laban maya nya orang nyau kisuh deka bebelika perengka kena nyambut Krismas. Labanka jarang mai kereta besai ngagai puak nengeri, amat tak berasai endar sepi aku.

Nyau pemuaska besundangka jalai, lalu nadai ga kami nemu jalai nuju muzium. Ka pan enda kami sebuat pulai ngagai apartment baru. Ari nya kami lalu ngena teksi. Hahaa, nadai ga jauh endar tempat ke enda ditemu tadi. Tang nadai ngawa, ukai nya nyamai ngiga jalai enti terubah ia nemuai ngagai menua orang.

Ahhaaaammmm... nyau ngantuk mata tu. Ni enda, jam udah pukul 1 pagi. Mupuk dulu aku. Ila nampung baru Trip ke Sabah Part 2.

Wednesday, October 24, 2012

Trip Ke Sabah Part 1

Kenang tu semina mulai ke pengingat aja. Dikena ngingatka singkang pejalai diri / kami sebilik. Ukai deka bemegah-megah. Sigi kenang rindu ati, ngichaka bisi dibacha diri empu, bala anak, uchu ichit jemah ila hehe... Laban ke kelalu lama udah, nya alai bisi sekeda tempat ke ngetu tauka tempat ke ditengah nyau enda ulih dikingat agi.

Maya pemisi ujung taun 2010 kami menyanak bisi ngambi peluang nemuai ke Sabah. Tu penemuai kami duai ke Sabah. Keterubah ia taun 2003 suba, maya honeymoon ko jaku ribai. Nyadi sekali tu nyau ukai honeymoon laban anak pan nyau udah dua iku hehe... Ukai semina kami menyanak aja, menyadi aku sebilik mega enggau. Sepuluh iku kami kin nyengkaum indai aku serta adi ipar aku.

Pejalai kami tu amat 'mencabar' laban kami nengah jalai darat. Sengaja milih jalai darat, deka meda rampa menua orang. Puas amat asai hati matau menua ke enda kala ditengah tauka dipansa ngelama tu... Indai, nama agi nya telengga-lengga meda rampa menua ke dipansa.

Neresa Menua

 Boulevard, Miri
16 Disember 2010: Pejalai kami menyanak belabuh ari Roban. Sempat ngetu merarau ba pasar Selangau. Kali kedua udah merarau ba Selangau [Ke bendar, aku jarang amat bejalai ngagai menua tunga ke Bintulu, Miri, Kapit enggau Limbang. Nya alai tak enda tentu apal ke menua adab kia]. Dikena ngedarka punggung ke nyau penat, kami ngetu enda lama ba Batu Niah sambil ngisi minyak. Enda mukai-mukai aku di sapa siku atendan ba kedai pam minyak nya. "Cikgu" kenu ku anembiak lelaki nya. Nemu meh aku nya x student aku suba tang aku nya enda ingatka nama ia agi [kelalu mayuh anembiak udah enggau betemu, nyau enda alah dikingatka agi nama sida. Minta ampun]. Sempat mega berandau ngerampas enggau anembiak nya tadi [ari Pakan, Julau].

Nyau pengelama ke nengah rantu jalai, pemanah ia hari kami pan manggai ba menua Miri. Lapan jam driba nya baru datai di Miri [laban endar sigi lubah / laju?]. Pama ga pemenat punggung enggau belakang. Ba Miri kami bemalam dua malam ba rumah menyadi aku di Taman Tunku. Malam nya tudah aku enda tentu ulih tinduk laban ke kena tabin / selesema [endang udah bisi tanda pagi tadi sebedau kami mupuk ari Roban]. Nyau diempa ke ubat flu lalu bebungkur apus baru pama agi. Puji Tuhan, pagi nya selesema aku baka ke dibuai empeleman. Gerai. Idung pan berasai tawas nadai agi gatal.

Mai bala anak ngagai taman air ba Miri
18 Disember: Kami konvoi dua buah kereta, mupuk ngejang ke Miri nuju Brunei. Maya mansa imigresen Miri-Brunei, nadai ga beleman. Di Brunei, kami ngetu enda lama ba rumah menyadi aku tu tadi [Kuala Belait], ngambi barang sida mimit. Urung pukul 9.30 pagi kami mupuk baru. Siti penyamai driba ba Brunei, jalai alun ia lurus serta 'standard'. Nadai belubang tauka betampal din ditu. Lanchar aja asai driba.

Datai ba pos imigresen Kuala Lurah [area Brunei], entuka bebaris naka ia pemanjai. Bisi satu kilometer penyauh. Akai dai... aku sigi lembau amat nama driba baka tu. Patung mudah amat penat kelebih agi mai kereta berat baka Hilux. Nyau bisi setengah jam, baru ulih limpas. Datai ba pos imigresen Limbang nadai ga lama ni bebaris taja kereta mayuh.

Nyau pengelama driba, kami datai ba Bandar Limbang. Kami sebuat ngetu merarau di Limbang. Ngerumban hari, kami sebuat mupuk baru ninggalka Bandar Limbang. Nengah pos imigresen Limbang - Temburong. Udah nya masuk Brunei baru, pansut ari Brunei masuk Lawas. Akai akai akai, sejam lebih kami sebuat tepagang nganti feri Sungai Pandaruan. Kereta nyau betusun. Nyau bisi ka ka pedis hati ngelamanya nganti dia. Ni enda pedis ati, hari nyau makin lemai-selemai, pejalai tau dikumbai baru setengah.

Di Lawas kami semina ngetu ngisi minyak aja laban beguaika jam. Maya nya urung pukul 4 lalu. Hari enda tentu manah, langit bemua ari. Bisi chelum-chelum mimit. Hati ke rindu sereta gagit nyau bisi pengirau. Takutka dipangka ujan. Ukai nyamai driba laban ujan kelebih agi nengah jalai ke enda kala dipansa. Sekumbang ba rantu jalai bisi meh maya nya ujan, bisi ga maya teduh. Kami sebuat majak ke pejalai diri.

Puji Tuhan, kami sebuat datai di Sindumin [sempadan Lawas - Sabah] jam udah lalu pukul enam lemai. Langit bedau mamban, nandaka hari ba menua nya deka ujan. Enggai muai jam, kami neruska pejalai nyentukknya nyau datai ba area Beaufort. Hari ujan naka pengelebat.

Udahnya kami bekejang baru ngelaban ujan ke lebat amat. Jalai nadai tentu ulih peda,  tambah ke hari ke nyau udah petang tegayam. Aku majak lubah mai kereta ketegal mata ti alah laban panchar lampu kereta ke datai ari mua. Tambah pia, ujan nadai tanda deka ngetu. Kami sebuat enda ngetu besampi ngajihka pejalai kami mujur sereta likun. Bisi sekali kami sebuat tesat, salah jalai. Nyau datai ba rumah urang. Baka lekik ketawa kediri udah tesat.

Pejalai kami manggai ba semak Papar, ujan pan teduh. Lantang asai seput. Baru nyamai agi driba sereta jalai pan tampak dipeda. Urung pukul 9.30 malam, kami datai ba area Api-api. Nyau pemuas ke kalat-kalat, malik kiba malik ga ke kanan, baru kami sebuat tepeda ka tempatka ka dituju. Kami lalu napatka Promenade Apartment. Seninjik bendar ba mua apartment nya mayuh tempat parking.

Sebedau niki, aku sempat meli chicken rice [tapau] ke kami sebuat. Seninjik bendar kedai makai ke besemak dia bedau tutup. Baka rejat kami sebuah mai beg gari diri empu nuju lif [enda aku ingat agi tingkat berapa bilik kami lalu ba blok ni endur kami laban apartment dia mayuh amat blok]. Datai di bilik, bala lalu nuduk ke diri magang. Semua serbana ka diri lelak, pedis punggung, pedis patung, pedis belakang. Nyau semua tubuh pedis tepenat.

Bilik apartment nya umbas ia pemanah. Engkeman endar endur tubuh mayuh. Taja bilik tinduk ia semina dua itu tang ruang tamu ia besat amat, bisi sofa serta meja makai. Bisi dua iti bilik mandi, ruang dapur enggau mesin masu gari. Ba dapur sigi disediaka dapur gas, periuk serta kali sigi. Puas hati. Bilik bisi kati king saiz serta bisi airkon.

Udah bebela, mandi indah bala pan nyau ka ngenat kediri. Bela lelak laban pejalai ti bangat jauh. Pukul 8.00 pagi ari Miri, datai di sabah pukul 9.30 malam. Tang pekara ti balat muai jam enti deka nengah jalai darat ke Sabah nadai utai bukai kelimpah ari ngetu ba pos imigresen enggau nganti feri. Ari Miri sampai ke Sabah, kami sebuat udah mansa / ngetu ba 8 buah pos imigresen. Udah nya, tepekul maya nganti feri. Enti ditulak tambah, pelaba aku semak 3 jam tebasau laban dua perkara nya.

Akai dai... nyau ka ngetu dulu aku. Ila nampung cherita kami sebuat tu baru, ngenang pasal pejalai kami di Kota Kinabalu ke penuh enggau pengerindu.

Trip ke Sabah Part 2: Pasar Filipino, Muzium Sabah,
Trip Ke Sabah Part 3: One Borneo, KK Plaza, KK Waterfront
Trip Ke Sabah Part 4: Centre Point, Plaza Wawasan, Wisma Merdeka, Pasar Malam
Trip Ke Sabah Part 5: Pejalai Pulai

Friday, October 19, 2012

Nama Berita?

Apu, nyau ka dua minggu aku nadai post apa-apa ba blog aku tu. Ukai ketegal udah leju, ukai mega laban enda rindu tang meh peluang ke nadai tentu. Kebendar, aku 'begedi' ke line ti kelalu lubah, nyau lubah ari tekura. Kitai sama nemu pengelubah tudah tekura, line broadband celcom kami ditu lubah agi. Kadang-kadang, ka upload gambar, nyau setengah jam apin meh ulih. Sapa nda geram! Udah dua minggu penusah line terkura kami ditu baka tu. Entah, nama mimpi lemai tu tau ulih. Taja pia, ka muka blog diri asai ke nganti orang ngangau ka nama maya ka betemu enggau lutor ba sepital perintah. Akai dai!

Ney, nyau baka ka bula aku ke kita. Ka pan enda munyi nya, ukai enda suba aku madahka diri deka bekunsi berita pasal juluk ati aku ke deka numbuhka kebun buah. Smpai diatu, nadai meh udah aku ngepos berita tauka gambar. Haha, minta ampun. Nadai aku bula. Tang meh projek aku nya baru belabuh. Babas udah ditebas tang meh hari tak nyau selalu ujan [nyangka nya meh line kami ditu lubah ari tekura. Pelabaka aku aja meh nya]. Reban lalu bedau ditunu. Projek lalu nadai belinsur, nya alai nadai aku ngenang pasal projek kebun buah aku nya.

Ngetu randau pasal kebun buah, diatu aku ngenang pasal sekula enda lama. PMR udah ga tembu. Diatu nyau nganti SPM enggau STPM ga. Laban ke jaga anembiak Tingkatan 6, tak berasai kusut runding ngenang anembiak. Asai ka tak udah naka ulih mega meri penemu ngagai sida. Macham-macham program enggau startegi dikena nulung sida. Ti nemu muchau, udah aku muchau ngambi sida pas magang dalam peresa ti ka datai. Nyau asai ke udah rangkai idea. Nya alai, udah tu tak arapka sida ia empu meh mansal diri belajar ngena peluang ti bedau. Kitai ke apai indai, bala pengajar semina tak ulih besampi arapka sida mujur. Ooooohhaaaaaaaaaaaaaaaaaaaaaaa......

Nadai berita bukai tu. Pala tak selalu pedis seminggu dua tu. Ka beperesa ngagai lutor lalu enda saenda. Taja pia, anang ga enggai nemuai agi ngagai blog aku tu. Amat meh aku jarang ngirum berita, tang penatai kita sigi di anti.

Selamat betemu baru.

Wednesday, October 3, 2012

Juluk Ati

Lebuh pulai ke rumah panjai, aku selalu tekenyit meda gaya rampa menua dipansa. Sekali mansa, peda bisi ga berubah. Dua tiga minggu udahnya, maya mansa baru, majak mayuh utai berubah. Sepemanjai nisi jalai pulai ke rumah panjai, nyau tawas udah menua laban bala Iban. Enti setahun dua ke udah, enda ga utai ngenyadi nya. Sebelah tisi jalai agi babas repa. Semina bisi setumpuk dua kebun lada enggau getah ke bisi dipeda.

Maya ka pulai minggu dulu tu tadi, aku balat tekenyit ati meda rampa menua amat tak udu berubah. Sebelah tisi jalai, nyauka tau dikumbai kitai nadai babas agi. Nama utai dikereja bala Iban? Ni bisi utai bukai, semua belumba-lumba numbuhka kebun sawit. Puji Tuhan ke udah muka runding bansa aku ngambika enda kelalu tinggal ari bansa bukai kelebih agi ari sukut ekonomi enggau pemansang. Semua nyau udah enchelak, udah tebuka runding nemu prospek bekebun kelapa sawit tu tau mai penguntung ti besai enti dikereja enggau meruan.

Puas ke berunding, tetenguk ga ati meda pengawa dikereja orang. Tang nadai meh daya. Taja umur tau dikumbai agi benung tulang, tang meh pengelandik enggau pengeras ati ka ngereja pengawa baka enggi orang bukai sigi nadai dianjung. Enti nyema bisi orang bekerja lalu diri empu semina ngeluarka modal, pama ga agi. Tang enti nganjung tulang diri, sigi nadai. Kebun kelapa sawit ke udah ditumbuh [udah dua taun bejual buah] pan bekunsi enggau menyadi. Orangka ngereja.

Apin lama ke udah, aku bisi minta tulung menyadi aku mai beberapa iku [6 iku] orang gawa nebas babas ba sebidang tanah kami. Seninjik bendar apak ia ba tisi jalai alun. Kenu ku ati, deka numbuhka kebun buah [ukai buah kelapa sawit hehe...]. Ngicha ka pengawa nya enda kelalu berat baka pengawa bukai. Kira ulih intu diri empu meh nya. Nya alai, ujung minggu tu lagi enti hari manah / panas, deka mai orang nunu reban.

Tanah nya umbas ia pemesai, kira 2 hektar. Nitihka juluk ati, semua tanah nya deka ditanam enggau macham-macham buah nyengkaum buah kampung baka buah puak, uchong, isu, sikup enggau ke bukai kelimpah buah bandar baka sida mutan, lensat, rian, mata kucing enggau mayuh agi buah bansa bukai. Enti nitihka perambu, bisi 30 bansa buah deka ditanam dia. Nyadi, aku empu pan benung bebelika tambak buah mimit-mimit.

Besai juluk ati aku deka meda kebun buah tu nyadi kebun buah bedandang besai ke terubah ba menua kami dia. Ukai jaku besai, ukai manjung pala wung lalu ukai mega luba-luba. Aku ke becherita dulu tu ukai deka madah ke pemagas diri entang deka enchabar diri ngenyadika juluk ati aku tu tau nyadi nyata. Malu ga tudah aku enti aku enda bebendar nyapai juluk ati laban aku udah dulu becherita enggau kita.

Udah tu ila aku deka ngepos gambar-gambar bekait enggau pengawa numbuhka kebun buah tu.

Tuesday, October 2, 2012

Penemu Baru

Hari chelap amat lemai tu sepengudah ujan ngalih hari tadi. Sempat mega ngelapka mata enda lama. Udahnya, lelengau ka belelang sebelah menua siber. Nadai tuju ke nyenggala tang tak rindu ati aja. Sigi bejalai ngerembang, bejalai neresap. Belelang ngiga seleka dua penemu baru.

Enda mukai-mukai tak tetemuka blog siti tu... Berandau@CHAT ke diempu Panggau Libau Blogger [Pengiran Muda Papa a.k.a PMP]. Aku tetarit ati meda siti artikel ke dikeluarka ba blog tu ianya Kalendar Iban [12 Bulan Taun Iban]. Tu endang siti penemu baru ka chukup berega ba aku. Aku sigi enda nemu pasal kalendar Iban [naka pemalu].

Nyadi aku ka bekunsi enggau bala bukai kelebih agi bala ke sigi mabu penemu pasal pekara baka tu. Artikel di baruh tu diambi ari blog Berandau@CHAT. Meri besai terima kasih ngagai unggal Pengiran Muda Papa ke udah bekunsi pasal bulan Iban tu [minta ampun  mega ngagai Panggau Libau Blogger ketegal udah ngambi artikel tu.]

Ti kita deka nemu silik agi pasal blog  tu kita tau nemuai ngagai http://berandau.blogspot.com. Blog tu mega siti blog ke ngemeranka jaku Iban. Meri puji ngagai unggal PMP ke bempu blog ti manah sereta canggih tu.

Saturday, September 29, 2012

Belakun Aja...

Haha... tu gambar Esther maya pulai ke Bau apin lama ke udah. Baru darjah dua, tang udah landik deriba lipan [istilah ke suah dikena ba menua kami hehe...]. Marya mega enggai alah, taja enda ulih deriba, begambar semak lipan pan udah chukup.




Akai dai... ulah bala anak maya begambar. Sigi landik, tau jadi model KFC.

Monday, September 24, 2012

Nuchi Mata

Ujung minggu tu tadi, sekali agi kami menyanak rembus ngenyit ke Kuching. Ukai ngenyit nama, endang nadai rancangan ka nemuai. Hari lima, udah abis kelas terus mupuk ka Kuching. Pukul 2.00 mupuk, pukul 6.00 datai ba Desa Ilmu.



Hari enam sempat mai bala anembiak bejalai [bala anembiak form 6 ke enggau ngulu Sidang Pleno Pengajian Am ba SMK St. Joseph].

*Line slow amat. SEJAM semina ulih upload 3 iti GAMBAR! Tensionnnnn... Enda ulih anti line tu, lubah ari tekura. Mupuk dulu aku, ila nyambung randau.

Sunday, September 9, 2012

Sayau

Pemisi apin lama ke udah, kami menyanak bisi nemuai ngabas rumah ba Desa Ilmu, Kuching. Lelengau, udah dua bulan nadai nyenguk rumah. Sempat ga ngerachun rumput ke majak tinggi ba tisi rumah sepengudah dirachun pemisi bulan enam suba.

Bisi sekali kami menyanak bejalai ngagai tasik ke enda jauh ari rumah [agi ba kawasan perumahan]. Rindu meda rampa tasik tang siti penyalah ia; sampah @ uras! Uras beterabur ngemediska mata. Gilau-gilau tudah kami menyanak ngiga tong sampah tang nadai. Taja tong sampah nadai disediaka, enda patut ga kita muai uras sebarang endur. Malu enti sema orang luar datai meda kawasan nya kamah amat.

Nambahka hal uras, rumput sebelah nisi tasik pan panjai nadai ditebas. Tau endur rusa belalai kenu ko orang tuai. Ni orangka dipadu ke nebas rumput nadai nebas? Sayau amat, enti dijaga manah, tasik nya tau nyadi endur ngelantangka ati kelebih agi maya lemai ari.



Tuesday, September 4, 2012

Pengawa Belian

Nama berita kaban semua? Lama dah nadai nulis ba blog tu. Arapka semua bala kaban ke bisi ngetu ba blog tu gerai selalu lalu mujur dalam pengawa kita. Anang jera nemuai taja kadang-kadang empat lima ari baru aku bisi nulis ba blog tu.

Apin lama ke udah, kami menyanak bisi pulai ke rumah panjai laban menyadi aku madahka sida ia menyanak deka ensiang diri. Bisi mimpi. Aku enda muai peluang meda manang belian enggau semak. Bala anak pan ngeringak ga meda manang belian laban pengawa tu nyau majak jarang dipeda kitai.


 Manang benung begama. Ngama ba tempat kitai ke selalu berasai pedis. Selalu ia manang nemu batu. Anang nanya aku bakani, aku enda nemu hehe...
 Pagar api
 Manang benung belian
 Manang benung luput [ngambi semengat]
Ngirup! Dikena menggal program
 
Pengawa belian tembu enti udah makai salau. Rindu makai salau taja jam nyau udah jauh malam [selalu ia udah lepas pukul 1 tauka pukul dua pagi]. Masuk ga nyawa makai laban rindu berumpu enggau pangan diri. Rindu betundi.

Wednesday, August 22, 2012

Bejalai-jalai

Maya pemisi tu meh peluang deka bejalai meda rampa menua. Hari minggu tu tadi, kami menyanak pulai ke Bau. Sempat mega bejalai ngagai Gua Angin, enda jauh ari SMK Lake. Udah berapa taun nampil orang ditu lalu beratus kali udah mansa menua tu, tang baru dua kali aja udah ngindik kaki ngagai Gua Angin tu. Tu sekeda gambar kami menyanak maya ba Gua Angin [Enda masuk gua, hehehe.....]. Mayuh amat orang datai kia maya kami menyanak nyangkai ka kereta.

Saturday, August 11, 2012

Tukis vs Wayang Gambar

Kemari kami menyanak bisi pulai ke rumah panjai laban ngetas ulit petunggal kami ke udah nadai bulan 7 tu tadi. Rumah sida ari ili rumah kami, sepenyauh 5 minit ngena kereta. Pagi tadi, lebih kurang pukul 6.30 udah datai ba rumah sida. Baka selama, pengawa ngetas ulit bejalai lanchar. Pukul sebelas pagi, pengawa tembu, kami pan mulai kediri.

Hari panas amat. Enda nyamai amat diau angat bakanya, aku ngasuh menyadi kami ke ngintu bilik masang injin api [generator]. Ulih ga masang kipas sambil meda tv. Baka selama, enti masang tv, bilik sigi penuh laban anak mit. Bala anak sempat masang DVD ke baru dibeli. Nama agi, begau anak mit meda tukis @ wayang gambar pechuma.



Tu meh gamal anembiak ke bisi datai meda tukis. Hehe rindu meda ulah sida. Bilik chapuh laban bunyi ketawa sida. Bisi sekeda nya dikelala gamal tang enda dikelala nama.

Monday, August 6, 2012

Pejalai Rindu Ati

Hari 4 minggu tu tadi, kami menyanak pulai ke Bau [ngambi cuti hari 5]. Bisi hal deka diaduka. Maya di Bau, sempat bejalai kin kitu. Muai stress kenu ko jaku.




Esther & Marya begambar ba langkau umai orang Bidayuh. Langkau tu digaga kena nyambut Pesta Fairy Cave ke deka diatur minggu ti ka datai.


 Esther & Marya begambar enggau aunty seduai ini ia.

 Sempat betemu Father Adrian, minta ia merkat pengidup kami menyanak.

 'Lawatan tidak rasmi' ngagai pegung ikan bapa mertua hehe... rindu amat meda ikan begau, kumbai sida kami datai deka meri makai.

 Sempat mega nemuai ngagai kebun kuchai daddy. Kuchai enda tentu galak laban kemarau. Tanah nyau rangkai.

Sigi baka selama. Laban ke rindu ngambi gambar, tak semua utai deka digambar taja pan ngena kamera digital biasa aja hehe. 

Wednesday, August 1, 2012

Jadi Juru Foto

Lemai kemari kami tiga menyanak [Esther enggau Marya] bisi nemuai enda lama ke rumah panjai. Mummy ia enda enggau laban ke bisi kelas tambahan.

Baka selama, jalai Ulu Awik agi bedebu. Nyau ka masuk dua minggu, menua nadai ditinggang ujan, bala babas ke tumbuh ba tisi jalai sigi nadai temu gamal agi. Ari gadung nyau betukar chura nyadi coklat bedebu.

Bisi ba siti tempat, debu jalai nyau besemekih enggau sebun orang nunu dandang endur numbuhka kebun sawit. Ukai nyalahka orang ke bempu pengawa tang minta bala ke ngena jalai alun begadai serta bejimat agi. Enda alah kitai abis bebadi.

 Bilik 1

Bilik 2

Maya ke di rumah panjai, sempat ga diinjau bala kami serumah ngambi gambar bilik ia dikena ia ngisi borang 'bantuan ari perintah' ko tudah tuai. Seninjik bendar aku bisi mai kamera. Ulih ga nulung nyadi juru foto enda bertauliah. Benung tudah aku ngambi gambar tadi, enda mukai-mukai datai ga siku agi ngasuh aku ngambar bilik ia. Nadai ga beleman, ukai nya tak diasuh orang ngesan ramu. Mensa ga ti semina ngachitka kamera. Arapka peminta orang 2 pintu tu bisi dipalik perintah.

Friday, July 6, 2012

Terima kasih kaban

Tadi aku nerima telefon ari siku bakih. Ia madahka deka nganjungka aku ketam. Nama agi, begau bala anak ninga laban nya sigi pemakai ke dikerindu ka seduai. 2.5kg semina RM30.00 aja. Enti di pasar dini nemu ngemurah nya. Enti ba pasar tamu Serikei, pemadu murah dipeda aku ianya RM20.00/perkg.

Baka selama, nama maya mela ketam sigi aku meh nyadi master chef. Bala aku ukai enggai tang enda berani megai ketam! hehe.
 Agi idup
Udah dibela

Sunday, July 1, 2012

Kenang ujung minggu

Kemari kami menyanak pulai ke rumah panjai. Lelengau ke bala di rumah panjai. Jalai Ulu Awik sigi baka selama, bedebu nadai endur nyema. Datai di rumah panjai, nemu menyadi ke sebilik enggau indai aku [ngintu bilik tuai kami] benung masang tile ba penyandar ruai.



Bala kami serumah pan bisi mega sama duduk / bediri semak nya ngemataka orang masang tile. Enda mukai-mukai dia siku kami serumah lalu nyua ngagai aku surat khabar Utusan Borneo, 28 Jun 2012. Nemu nya tudah tuai deka madahka bisi bala kami besemak dia ngaga lapur ngagai media pasal jalai Ulu Awik ke majak jai laban lori balak. Aku empu udah kala mansutka kenang diri pasal 2 iti kem endur orang nugungka balak ba semanjai jalai Ulu Awik. Arapka bisi meh bala YB macha lalu muka mata ba senentang pengawa tu. Anang enda berundingka serebana ati rayat.



Benung meda TV kemari, siku agi ga kami serumah bejalai ngusung aku,  minta tulung ngisi borang bantuan. Naka ulih mega ngisi ke tudah tuai lalu nerang ke utai ti patut digaga ia ianya ngambi gambar dapur, bilik enggau ruai sida ke bukti sida sigi patut dibantu. Ngarapka ia bulih mega bantu ari perintah. Pagi tadi, tumu tudah tuai nganjungka aku pama. "Ulih anak aku demalam" ko ia. Enda nyangka bala anak nyau berebut ka makai pama tang takut meda mata enggau kaki jari pama ba chapak! First time bala anak makai "katak" ko sida.

Thursday, June 28, 2012

Deko Rumah Panjai

Rindu amat enti meda rancangan Deko Bersama Eric ke dipancarka ba Astro. Macham-macham konsep hiasan dikena sida. Tetengok amat deka ngaduka rumah diri nunda baka ke diayanka orang ba TV. Tang baka ni ko enggau, semua perabot enggau perengka ke dikena ngias rumah nya sigi bisi orang sponsor @ menaja. Dini deh orang ka menaja kitai, enda pia? Ka pa enda, diri empu meh nyadi penaja diri hehe....


Tu meh gaya dekorasi hiasan dalaman ba rumah panjai. Simple...tang puas ga ati meda. Taja enda ngemanah engi sida Eric Leong, sekurang-kurang enda ga tak bereba.

Sunday, June 24, 2012

Jalai Ulu Awik Tusah ka Madah

Dini bala pengari? Kini tunga bala menteri? YB?

Peda tauka dinga ke serbana penusah ati rayat. Anang semina maya deka bepilih baruh nyenguk rayat, udahnya lesap nadai dipeda ayuk.


Tu meh gambar Jalai Ulu Awik ke diambi aku maya pulai ke rumah panjai ujung minggu tu tadi. Ukai bejai sapa-sapa tang anang enda pedulika penusah sereta penyeranta mensia mayuh. Peda debu ke terebai ngalitka rampa jalai, tau ngujungka penusah bebadi ba jalai alun. Enda ibuh nganti udah bisi penusah baru begau. Seput nadai ulih ganti. Ni maya jalai tu deka ditar? Bisi kita pengari rayat berundingka penanggul bala anembiak redak kita maya ka betengah ke jalai ke bedebu tu?

Sunday, June 17, 2012

Secebis Memori

Secebis kisah si cilik Esther sedang menunjukkan sikap rajinnya. Memori semasa mendiami flat guru SMK Pakan. Beranda penuh dengan pelbagai jenis bunga.
 Tolong mummy siram pokok bunga.
Alahai... comey nya aksi si cilik ni...

LinkWithin

Related Posts Plugin for WordPress, Blogger...