Juluk Ati

Lebuh pulai ke rumah panjai, aku selalu tekenyit meda gaya rampa menua dipansa. Sekali mansa, peda bisi ga berubah. Dua tiga minggu udahnya, maya mansa baru, majak mayuh utai berubah. Sepemanjai nisi jalai pulai ke rumah panjai, nyau tawas udah menua laban bala Iban. Enti setahun dua ke udah, enda ga utai ngenyadi nya. Sebelah tisi jalai agi babas repa. Semina bisi setumpuk dua kebun lada enggau getah ke bisi dipeda.

Maya ka pulai minggu dulu tu tadi, aku balat tekenyit ati meda rampa menua amat tak udu berubah. Sebelah tisi jalai, nyauka tau dikumbai kitai nadai babas agi. Nama utai dikereja bala Iban? Ni bisi utai bukai, semua belumba-lumba numbuhka kebun sawit. Puji Tuhan ke udah muka runding bansa aku ngambika enda kelalu tinggal ari bansa bukai kelebih agi ari sukut ekonomi enggau pemansang. Semua nyau udah enchelak, udah tebuka runding nemu prospek bekebun kelapa sawit tu tau mai penguntung ti besai enti dikereja enggau meruan.

Puas ke berunding, tetenguk ga ati meda pengawa dikereja orang. Tang nadai meh daya. Taja umur tau dikumbai agi benung tulang, tang meh pengelandik enggau pengeras ati ka ngereja pengawa baka enggi orang bukai sigi nadai dianjung. Enti nyema bisi orang bekerja lalu diri empu semina ngeluarka modal, pama ga agi. Tang enti nganjung tulang diri, sigi nadai. Kebun kelapa sawit ke udah ditumbuh [udah dua taun bejual buah] pan bekunsi enggau menyadi. Orangka ngereja.

Apin lama ke udah, aku bisi minta tulung menyadi aku mai beberapa iku [6 iku] orang gawa nebas babas ba sebidang tanah kami. Seninjik bendar apak ia ba tisi jalai alun. Kenu ku ati, deka numbuhka kebun buah [ukai buah kelapa sawit hehe...]. Ngicha ka pengawa nya enda kelalu berat baka pengawa bukai. Kira ulih intu diri empu meh nya. Nya alai, ujung minggu tu lagi enti hari manah / panas, deka mai orang nunu reban.

Tanah nya umbas ia pemesai, kira 2 hektar. Nitihka juluk ati, semua tanah nya deka ditanam enggau macham-macham buah nyengkaum buah kampung baka buah puak, uchong, isu, sikup enggau ke bukai kelimpah buah bandar baka sida mutan, lensat, rian, mata kucing enggau mayuh agi buah bansa bukai. Enti nitihka perambu, bisi 30 bansa buah deka ditanam dia. Nyadi, aku empu pan benung bebelika tambak buah mimit-mimit.

Besai juluk ati aku deka meda kebun buah tu nyadi kebun buah bedandang besai ke terubah ba menua kami dia. Ukai jaku besai, ukai manjung pala wung lalu ukai mega luba-luba. Aku ke becherita dulu tu ukai deka madah ke pemagas diri entang deka enchabar diri ngenyadika juluk ati aku tu tau nyadi nyata. Malu ga tudah aku enti aku enda bebendar nyapai juluk ati laban aku udah dulu becherita enggau kita.

Udah tu ila aku deka ngepos gambar-gambar bekait enggau pengawa numbuhka kebun buah tu.