Cherita Teras Mali tu siti cherita ti tebilang ba menua kami di Meruji, Kabo [pelilih menua Saratok]. Cherita tu ngenang penyelai sepun teras ke tinggi dedegi ti tumbuh enda jauh ari Sungai Meruji [seberai pendai Rumah Matali, Meruji Ulu ke diatu].
Kenu ko cherita orang tuai, dalam taun 1950-an suba [nitihka pengingat orang tuai laban ke nadai rekod betulis] bisi seraban tiga iku bansa Laut [Melayu] datai nujah menua Meruji. Tuju sida nadai kebukai kelimpah ari berimba ngiga kayu teras ka berega [kayu ramu ke teguh amat]. Sepengelama udah bejalai neresap babas ngulu Sungai Meruji, sida sebuat pan tetemuka pun teras ke numbas ia pemesai tau ditebang.
Udah badu ngintu diri, siku ari bala sida nya tadi lalu enda chamang-chamang ngayunka beliung tajam ia ngabi ngelingi pun teras ke bisi dua pemerap pemesai ia. Ia meh abi beliung ia deka besatup ngelingi pun teras nya tadi, enda mukai-mukai ari lalu ujan nyala. Mata panas nyau perenching tang ujan labuh beberis.
Meda utai nyelai bakanya, sida lalu ngetu. Nyangka ba penemu bansa sida pan madahka ujan nyala tu mai tanda ke enda manah, dia sida sebuat sama seati bebai pulai [ba pengarap tuai Iban, bala antu nurun ngasu enti maya ari ujan nyala. Nya alai dulu suba orang enggai mindah enti ujan nyala. Bala ke benung ba babas kenanas ngiga rumput empasan diselitka ba pending tauka selapuk ambi ke dinding diri].
Pulai ngagai cherita sida bala Laut ke mulai ke diri tadi. Datai di rumah, kenu ko cherita, dia deh siko ari sida ke udah ngabi pun teras nya tadi sakit lalu ngujung ka ia mati. Bepun ari nya, pun teras nya tadi dikangau orang TERAS MALI.
Kati kita pemacha, arapka cherita tu? Enti enda arap, aku nguji becherita ke ujung agi.
Deka dikumbai bula, enggai ga nyadi laban nyentuk ke diatu, tibak abi beliung sida nya tadi agi ulih dipeda. Tibak nya bedau dalam, tang bekau tibak ngelingi pun teras nya sigi nyengenda. Pun teras nya pan agi degi-degi sampai ke sari tu taja udah lama mati. Diatu, puchuk teras nya enda ulih peda enggau manah laban lindung puchuk engkabang enggau puchuk tegelam ke tumbuh semaknya dia.
Nyentukka diatu bala ari batang Kabo, Awik, Lempa enda tinggal bala ari Wak, Pakan enggau pelilih menua bukai sigi agi bisi datai kita 'nganjung mimpi jai' sereta 'nganjung burung'. Nitihka cherita orang tuai, orang ka bisi jai mimpi tauka bisi jai burung tau nganjung mimpi tauka burung sida ia ngagai Teras Mali lalu mai ai dia [mayuh butul ditunggaka orang ngelingi pun teras nya]. Ai tu tadi diunsut ngagai tubuh orang ke jai mimpi tauka dipechikka sebelah bilik sida ngambika mimpi tauka burung jai tadi enda bisa, nadai ngachau menua, ngachau nyawa [penabar mimpi enggau burung ke enda manah]
Nya alai, enti kita datai ngagai Teras Mali tu, dia kita bisi meda mayuh bungkus piring sereta bungkus buk enggau kukut ke dianjung kia. Kita mega ulih meda mayuh duit syiling ti ngarey sebelah pun teras nya. Nya meh tanda pemeri sida ke datai kia [pengeras semengat]. Nambah ka nya, butul sigi mayuh ditunggka ba pun teras nya.
Tang nyau dudi ari tu, penyampau orang ka nganjung mimpi, nganjung burung ngagai Teras Mali udah jauh kurang. Bala ke tuai, ke agi megai pengarap lama nyau majak nadai, udah lesi nengali ari. Bala anembiak rebak baru pan nyau udah mayuh masuk pengarap Kristian, nyau enda arapka ke pekara bakanya agi. Taja pia, sejarah teras mali tu sigi enda mudah lenyau ari pengingat mensia ke nguan batang Meruji.
Tu ukai cherita tempa laban bukti sejarah cherita tu sigi agi nyata, agi nyengenda ulih dipeda nyentukka diatu. Taja pia, aku minta ampun enti cherita tu bisi enda betul susun, enda betul rurun. Aku nulis cherita tu nitihka pengingat aku agi biak suba maya ninga cherita orang tuai. Sapa-sapa kita ke bisi nemu cherita tu enggu silik agi, tau nyeruri tulis aku tu. terima kasih.
LinkWithin
No comments:
Post a Comment