Naka-Naka 'Nako-Nako'

         

Apu... amat tak kelalu ga sepi aku. Enda berasai, nyau ka setaun udah aku nadai nulis seleka urup ba blog tu. Enda kelalu ulah aku ba runding kita? Enti nitihka, enda patut aku 'ninggalka' blog tu ngelama nya. Tu meh antara blog keterubah digaga aku. Tu meh blog ke mayuh ngajar aku ngelala lalu mereti baka ni ngaga blog. Amat meh enda 'canggih' baka blog orang bukai, tang ba aku ke tau dikumbai 'rabun' ict, penembu blog tu suba sigi meri reti ke besai ba aku empu.

         Nesal dudui nadai reti, nunda ku leka lagu. Asi udah nyadi bubur, telajak perau pediska dibatak baru. Berasai sinu udah kelalu lama nempaya ka blog tu, aku ngambi pemutus deka ngidupka baru blog tu. Bepun ari sari tu, aku deka update blog tu enggau naka ulih. Keterubah ia, aku nyeruri header blog tu ngambika tampak berupai manah agi. Udah tu ila, aku deka ngaduka utai bukai ngambika manah agi dipeda sereta dilawa.
     
        Jauh ba dalam ati, aku nanya diri empu; bisi ke enda orang agi deka nemuai ngagai blog aku tu? Bisi ke enda orang deka macha kenang pengawa rama aku ditu? Nadai ku enggau, enti nadai orang macha tauka datai nemuai. Chukup meh blog tu kena aku ngerikut pengawa, pejalai sereta kenang diri. Ngicha ka jemah ila, bisi dipeda bala anak bala uchu.