Maya ke duduk tegenung meda mua hari ke majak chelum, pengingat aku terebai ngagai kenang maya agi biak suba. Rambau nya suba, ati sigi rindu. Penusah nadai kala besarang ba pala. Indah enda munyi ko jaku orang, makai tinduk enggau bemain aja ke ditemu.
Lebuh runding nikal ngagai pengujung tahun 70-an ngagai 80-an, ati berasai sinu. Bala bakih ke sama serambau nyau jarang enggau betemu. Betemu pan semina maya gawai tauka bisi pengawa besai ba rumah panjai. Enti enda pia, sigi nadai bepeda mua. Sama bela majakka diri gawa / kereja ngiga anak belanja.
Maya nya suba, nyau ka tiap lemai kami main 'beperang' ba dalam kawasan kandang sapi [pemesai bisi dua kilometer persegi]. Abis madang kemunting, madang teka ukui enggau paku kubok endur belalai ka 'munsuh'. Pedang kayu sigi ditangkin belama kena ngelaban munsuh. Tai sapi ke bejumboh sigi nadai dikenangi.
Puaska 'beperang', abis ga ruai endur main gagai, main baching, main selingkut, enggau main gasing [gaga ari leka buah teras tauka leka embawang]. Suah mega ke dianu bala orang tuai laban geladak ruai nyau munyika tebabak laban rejat kaki bala ke belanda. Ukai sekali dua ke deka dipalu bala sida ini ngena engkuit laban ke chapuh begagai sebelah ruai.
Enti maya mandi ke pendai, sigi enda pulih enti apin dikangau ka orang. Biar mata mirah, mulut nyau puchat lalu dagu nyau gegutak laban ke kelalu chelap, tang pengerindu begulai enggau bala pangan serambau sigi nadai alai manding.
Lebuh musim jambu bebuah, suah mega bala kami kisuk begagaka setik kena nyetik burung ke mayuh nutu bunga jambu. Lalu enti maya pisang bisi bebuah, abis tungkul pisang nya disilakka, ngambi asai manis ba tungkul pisang. Buah lemba, buah teka ukui, buah pak enggau buah kemunting sigi nyadi ke 'snek' maya nya laban menua ke jauh ari pasar.
Maya musim kemarau, sungai ke mit-mit nyau langkang. Nya meh maya bala nurun empulut. Sigi ransing ati kelebih agi enti maya bulih. Gegendai pulai ke rumah, beguai mantai ka ulih diri ngagai sida apai enggau indai.
Bisi maya nya, bala besemaia mai malun ikan [ngena kibung]. Amat tak renga bala ikan enti bala nurun malun laban ikan besai tauka ikan mit sigi ulih magang. Diatu baru nemu, pengawa malun tu enda manah laban tau ngasuh sungai kusi ikan.
Enti maya bumai, sigi rindu bemain sebelah tegalan kelebih agi enti umai baru udah ditunu. Rindu begagai ka buntak, rindu bekumpulka kulat amau enggau kulat buluh. Kadang-kadang bisi tetemuka tinduh ba pun aping ke udah ditebang serta setengah angus empa api maya nunu.
Suah mega enggau bala menyadi ngetan bubu tauka ensenga ba sebelah sungai tisi umai. Enti nasib manah, kadang-kadang bulih anak lelabi. Kelimpah ari nya, suah mega kami menyadi nangkap anak muri [emburi / memuri]. Enti maya padi udah nyadi, sudah sida apai turun ngiga buntak. Maya ke bulih, sigi tak meretik munyi buntak disimpan dalam kambut tauka kibut.
Aku mega kala enggau orang nyuluh, nyagang tauka ngiga pama. Laban ke bisi endar ngembuan pemuyan bejalai malam sebelah babas [malu nyebut], penurun aku enggau bala nyuluh sigi ulih tiap enggau jari aja. Pia mega ba pengawa ngasu, sigi berat-rat sida apai sida indai enda ngasuh enggau urang. Enggaika enda tetitihka urang tauka enggaika peluru tesat. Nya alai, diatu aku beasai amat rugi laban nadai pengingat senentang pengawa ngasu.
Laban ke nyau besekula, mayuh amat pengawa di rumah panjai dilengka ka. Tambahka jarang pulai ke rumah ketegal sekula ke jauh, ngujungka pengeregas ngereja pengawa ba rumah panjai nyau majak kurang. Bala bakih pan nyau udah bisi ruang bilik magang-magang, bisi nya nyau diau di menegri tauka bebini ke menua bukai.
Diatu, semua nya nyau tinggal pengingat aja. Mayuh anembiak rebak baru enda nemu bansa pemakai enggau main asal rumah panjai. Sida lebih nemu cherita tv, main komputer, play station, betalipun binching. Ukai nyalah anembiak baru ke diatu, tang nya meh tanda ubah singkang pemansang. Semina jauh ba lubuk ati, berasai sinu ngenang mayuh pengawa rama enggau main ba rumah panjai udah 'dilengka'.
LinkWithin
No comments:
Post a Comment