Kala ke enda kitai nanya ngagai diri empu, 'aku tu udah chukup mentas?'. Uji peragam ati diri lalu saut tanya nya enggau ati sereta runding ti pemadu lurus. Nama saut kita? Anang enda ingat, tiap iku kitai mensia bisi diberi petara 2 iti ati ianya ati mit [hati kecil] enggau ati besai [hati besar]. Anang saru, tungkul ati kitai mensia sigi semina siti aja.
Nemu kitai bida dua iti ati tu?
Maya kitai bejaku kerah-kerah madahka pengelandik, pengaya tauka pemandai diri, nya meh dikumbai orang ati besai. Maya orang muji, kitai mudah temegah ati sereta berasai tinggi. Ati besai tu meh ke suah agi 'bula' ke kitai, enggai nerima pengelemi sereta pengurang diri. Enggai ninga jaku bantah 'kritikan' orang.
Lalu lebuh maya kita nemu sereta nerima pengurang diri, nemu serebana ati diri, ngakun ke pengelemi diri, tu dikumbai orang ati mit. Ati mit tu sigi enda kala bula ke kitai. Ia nemu semua pemula tauka pengamat saut ati kitai, pengelebih sereta pengurang diri sereta ngasaika ke pengidup ke amat.
Nya alai, uji tanya ngagai ati mit kitai diatu, 'aku udah chukup mentas?' 'Aku udah chukup rajin?', 'Udah ke aku ngereja pengawa ke diasuh orang enggau manah?'
Nama saut ati mit kita?
No comments:
Post a Comment